كتبت: شيماء الباشا
نشر المؤلف والسناريست عمرو محمود
ياسين عن ذكريات #اللي_مالوش_كبير عبر صفحته على مواقع التواصل الاجتماعي "وقت ما كنت بكلم
صديقي وأخي أيمن بهجت قمر عن الأفكار اللي في المسلسل عشان يكتب التتر بتاعه اللي
باحييه عليه جدا. قلت له ان من ضمن
الافكار اللي عايز التتر يتكلم فيها. فكرة ان اللي بيختار غلط ويفضل متمسك بغلطه
و مستسهله حياته بتبوظ .. فكتب الجمله
الجميله دي بالاغنية .. "واللي بيختار غلط
سكوته يدمره " ... يعني اللي بيختار
سكة مش تمام و ما يحاولش يغير فكره بالوقت المناسب حياته هتدمر .." كما أضاف رداً
على بعض المعترضين على نهاية المسلسل وأحد خطوطه الرئيسية، والذين كانوا يريدون
تحويل العمل الدرامي إلى عمل وعظي ديني هدفه التوبة: "فييجي بعض الناس عايزين
يغيرولي احد الأفكار الرئيسيه في المسلسل و يخلوني اتكلم عن التوبه ..ويقولوا لي
كنت خليه يتوب .. طيب ماهو انا في العمل ده عايز اتكلم عن الناس اللي مش بتوب ! انا بناقش فكرة
استسهال الخطأ و الثبات عليه و اثره ع الإنسان و ع المحطيين به .. بعمل شكل من
أشكال الزجر لكل من تسول له نفسه انه يمارس البلطجة و الإجرام ..و بوريله انه
ممكن يخسر كل شيء. زي ما الخديوي خسر اخوه و خسر صديق عمره وخسر الجنين اللي كان
في بطن زوجته ..وخسر حياته اللي كان متمنيها مع الزوجه اللي حبها ..وفي الاخر خسر
حياته شخصيا.. هتقولي طب خلتنا
نحبه ليه .. خليتك تحبه لانك
لو محبتوش انت مش هتكمل المسلسل اصلا ثم ان انت حبيت فيه لحظاته المميزه مع الناس
اللي بيحبها اخوه صحبه.. حبيبته.. ولاده ..طبيعي هيبقي كويس معاهم !! لكن انا ماخبتش
عليك انه بلطجي ! من اول لحظه وانت
عارف انه راجل مفتري و خارج ع القانون..من الحلقات الاولي و انت شفته. رايح يتفق
على قتل انسان مايعرفوش مقابل المال ..يعني هو قاتل
مأجور!! السيناريو لم
يخدعك وقالك كل الحقائق من بدري .. طيب انت اخترت تحبه .. بس ده لا يعفيه من المسؤوليه انا
لما موت مالك و موت مينا و موت الخديوي ماعملتش ده عشان انكد عليك .. لكن عشان
أؤكد ع فكره معينه عايز اوصلها للمتلقي .. هي ان اللي يختار غلط سكوته يدمره! " كما كشف عن رؤيته
وسبب تسمية العمل بهذا الاسم تحديداً، حلل هذا موضحاً: "جملة اللي مالوش كبير
اولا كعنوان للمسلسل بقصد بيها اكثر من معنى. أما الاول فا هو اللي مالوش كبير
بمعني من لا يمتلك سند ولا ضهر و دي كانت حالة غزل وفي اللي مالوش كبير بمعنى انه
مش بيعمل حساب حد. و ده باقصد بيه عابد تيمور و سيف الخديوي .. اما جملة اللي
مالوش كبير الحب يغيره فدي بقصد بيها حاجتين الاولى ان في حالة غزل لما الحب دخل
حياتها فا اصبح لها كبير لها شخص يحتويها و يدافع عنها. اما في حالة سيف فا هو
مالوش كبير. و شخص قوي وجبار جدا لكن ضعف ادام الحب و مبقاش نفس الشخص. و ده قاله
في مشهد العربيه لما كان بيرجعها لعابد تيمور و الحب ده كان لازم يغير كل حياته.
لكن هو ماعملش كده عشان كده ورا منها ع طول هتلاقي جملة واللي يختار غلط سكوته
يدمره. وده اللي حصل
معاه ..الحجات الشريره مهمشها عشان مش عايز ازود مشاهد العنف ع قد ما اقدر لكن كل
شويه كنت اعمل مشهد افكرك بيه ان الخديوي ده مجرم و انه بيتفق ع عمليات شمال عشان
ماتنساش و مكنتش بجيب العمليات دي" كما كشف مصطفى
فكري، مخرج مسلسل اللي ملوش كبير، عن كواليس العمل فني، خلال لقاء ببرنامج
"صباح الخير يا مصر"، المذاع على شاشة القناة الأولى والفضائية المصرية،
ويقدمه الإعلاميان حسام حداد وجومانا ماهر، وكما نُشر بجريدة الوطن بتاريخ اليوم،
قائلا إن المسلسل في بدايته كانت مغايرة، وبعد الوصول للحلقة الثالثة أبدت الفنانة
ياسمين عبدالعزيز عدم اقتناعها فجأة بالمسلسل ورغبت في فكرة جديدة. وأشار إلى أن
الفنان أحمد العوضي عمل بشكل كبير على دوره في المسلسل، ولم ير فنان بهذا التركيز
في حياته، ولديه تركيز غير طبيعي، "من أول ثانية وهو لابس شخصية الخديوي بشكل
يخوف، وقولنا ربنا يستر لدرجة إن ياسمين بتقوله أنا عاوزة أخلص من المسلسل دة". وأكد أيضاً أن
99% من كلمات شخصية «الخديوي» من اختراع أحمد العوضي - كما أوضح احمد العوضي نفسه
هذا في بعض اللقاءات أنه مبتكر تفاصيل شخصية الخديوي بنفسه - بما فيه جملة «على
الله حكايتك»، لافتا إلى أن المشاجرة التي حدثت في بداية المسلسل "كان مشهد
ضرب حقيقي"، وتم تصويره في 4 ساعات، رغم ظهوره على الشاشة 40 ثانية فقط. ولفت إلى أنه
استعان بمخرج أكشن متخصص في مشاهد المشاجرات بالمسلسل، والمخرج يعد مرآة الممثل،
ومنذ البداية كان يرى أن ياسمين عبدالعزيز ليست ممثلة كوميدية فقط، قائلا:
"كنت صعبان عليا إنها حاصرة نفسها في الكوميديا فقط، وياسمين اشتغلت جامد على
الدور دة وفاجئتني كتير ومكنتش متوقع ياسمين هتعمل كدة خاصة في فترة السجن، لدرجة
قولتلها متطلعيش بمكياج بعد كدة، إنتي شكلك أحلى من غيره". كما كتب الفنان خالد الصاوي عبر
صفحته على موقع التواصل الاجتماعي فيسبوك، انه سعيد بمشاركته في هذا العمل واشاد
بالجو الخاص بموقع التصوير الذي كان مغموراً بالحب والمشاعر الايجابية من قبل كاست
العمل وايضاً من قبل ياسمين والعوضي، كما اشار الي الارتياح بالعمل معهم. وعلى صعيد آخر
كتب الصحفي أحمد حسين صوان بجريدة الوطن ان الفنانة ياسمين عبد العزيز اعترضت على
نهاية المسلسل ولم تقتنع بها، و ألغت ياسمين عبدالعزيز، متابعة السيناريست عمرو
محمود ياسين بموقع التواصل الاجتماعي إنستجرام، بسبب نشوب خلافات بينهما قبل تصوير
الحلقات الأخيرة من مسلسل "اللي مالوش كبير". وتردد أن الخلاف قائم بسبب تدخل
ياسمين عبدالعزيز في سيناريو المسلسل، وإصرارها على تغيير نهاية المسلسل التي
قررها عمرو محمود ياسين، إلا أنّ السيناريست رفض التدخل بسبب حقوقه الأدبية التي
تمنحه أحقية رسم سيناريو الحلقة الاخيرة، دون تدخل المخرج أو أبطال العمل.
في النهاية نجد أننا امام عمل درامي
سوي، لم يظهر لما منه على الشاشة سوى التفاهم والاحترام المتبادلان بين فريق العمل
وأيضا لم يؤثر اي من الخلافات او الشد والجذب على علاقة فريق العمل ببعضه، فحرص
الجميع على العمل بمبدأ ان كل هذا لن يُفسد للود قضية بينهم، مما أظهر العلاقة
المليئة بالحب بين كل القائمين على العمل في كل مشهد من مشاهد المسلسل.
#اللي_مالوش_كبير
#احمد_العوضي
#ياسمين_عبد_العزيز
#خالد_الصاوي